Zer gertatuko da Alangoko babes ofizialeko etxebizitzetan bizi diren familiakaz 2031n? Galdera honek oraindik ez du erantzun argirik, eta EH Bilduk Getxoko Udalari bizilagunen etorkizuna bermatzeko neurriak har ditzala eskatu dio. Izan ere, etxebizitzen alokairu-epealdia urte horretan amaituko da, eta alderdiaren arabera, bertan bizi direnek ez dakite ordutik aurrera euren etxeetan jarraitzeko aukerarik izango duten.
Etxebizitza horiek Getxoko etxebizitza parke publikoaren parte dira, baina Nestar enpresa pribatuak kudeatzen ditu, lehen Lazora izenagaz ezagutzen zenak. EH Bilduk salatu duenez, enpresak 2011n Udalagaz sinatutako kontratua bete ez duelaren zantzuak daude, eta horiek ikertzeko eskatu dio udal-gobernuari.
Koalizioak azaldu duenez, azken urteotan hainbat kexa egin dituzte Alangoko bizilagunek. Besteak beste, mantentze-lanetan gabeziak daudela, enpresagaz harremanetan jartzea zaila dela eta alokairu-kontratuetan klausula abusiboak ezarri dizkietela salatu dute. Horrez gain, gaur egun 14 etxebizitza hutsik daudela jakinarazi du EH Bilduk.
Horren aurrean, Udalak egoera aztertu eta Nestarrek kontratuan jasotako baldintzak betetzen dituen argitu behar duela uste du koalizioak. Eta, ikerketaren ondoren, kontratua bertan behera uzteko arrazoi tekniko eta juridikoak daudela egiaztatzen bada, horretarako beharrezko neurriak hartzeko eskatu du.
EH Bilduk etxebizitzen kudeaketa berriro esku publikoetara itzultzea ere proposatu du. Horretarako, VISESAren edo Alokabideren bidez kudeatzea planteatu du, edota Getxoko Udalak zuzenean bere gain hartzea. Koalizioaren ustez, etxebizitza babestuen kudeaketan bizilagunen beharrak eta interes publikoa lehenetsi behar dira.
Bizilagunen etorkizuna, argitu barik
Kudeaketaren inguruko arazoez gain, EH Bilduk bereziki 2031ra begira dagoen ziurgabetasuna nabarmendu du. Alokairu-epealdia amaitzeko bost urte falta diren arren, koalizioaren arabera, familiek oraindik ez dute euren etorkizunari buruzko erantzun argirik jaso.
"Alangoko bizilagunek etxebizitza duina eta egonkorra izateko eskubidea dute. Udalak ziurtatu behar du gaur egun etxebizitza horietan bizi direnek etorkizunean ere bertan bizitzen jarraitzeko aukera izango dutela, inolako ziurgabetasunik gabe", adierazi du EH Bilduk.
Horregatik, Getxoko Udalari kontratua ikertzeko eskatu dio, baita balizko ez-betetzeak egiaztatzen badira neurriak hartzeko eta, batez ere, Alangoko bizilagunen etorkizuna eta etxebizitzen izaera publiko eta babestua bermatzeko ere.