Nolakoa da Getxo adinean aurrera doazen pertsonentzat? Erraza al da herrian mugitzea? Eta egokiak al dira aisialdirako, kirola egiteko edo eguneroko beharrei erantzuteko dauden aukerak? Horrelako gaien inguruan herritarrek zer pentsatzen duten jakin gura du Getxoko Udalak, eta, horretarako, inkesta bat jarri du martxan Getxo Lagunkoia programaren barruan.
Zahartze Aktiboko Zerbitzuak prestatu duen galdetegiaren bidez, herritarren eguneroko esperientziak eta ikuspuntuak bildu gura dituzte. Besteak beste, aire zabaleko espazioak, garraioa, etxebizitza, kirola, aisialdia eta Gizarte Zerbitzuak izango dituzte hizpide.
Ekimenaren atzean gero eta garrantzi handiagoa hartzen ari den errealitate bat dago: biztanleria zahartzen ari da, eta horregaz batera, herritarren beharrak ere aldatzen doaz. Hori dela eta, adinean aurrera egin ahala sortzen diren erronkei buruz hausnartu gura dute, Getxo herri lagunkoiagoa izateko zer hobetu daitekeen aztertuz.
Hausnarketa hori ez da hutsetik hasi. Izan ere, joan den ekainaren 12an egindako Getxo Lagunkoia topaketan hainbat gai eta erronka identifikatu zituzten. Orain, inkestaren bidez, herritarren iritziak jaso eta orduan landutako gaietan sakondu gura dute.
Parte hartu gura dutenek Getxoko Udalaren webgunean bete dezakete galdetegia. Horrela, euren esperientziak partekatu eta herrian zahartzearen inguruko hausnarketan ekarpena egiteko aukera izango dute.