Egunero mendekotasuna duten senideak zaintzen dituzten pertsonen lana aitortzeko hitzordua egin dute gaur goizean Romo Kultur Etxean. Zaintzaileen Nazioarteko Eguna atzo, azaroaren 5ean, ospatu zela aprobetxatuz, urteko Senide Zaintzaileen Topaketaren zortzigarren edizioa egin dute, eta ia 40 pertsona omendu dituzte.
Aurreko urteetako ildotik, topaketa zaintzaren inguruko esperientziak partekatzeko eta elkar entzuteko gunea izan da. Bertaratutakoek euren bizipenak azaldu dituzte, eta ipuin bat entzuteko aukera ere izan dute.
Ekitaldiaren amaieran, parte-hartzaile bakoitzak opari bat jaso du, eta mokadu txiki baten bueltan amaitu dute topaketa.
Hala, zortzigarren urtez, senideen zaintzan aritzen diren pertsonen eguneroko lana aitortzeko eta euren esperientziei lekua egiteko aukera eskaini du hitzorduak.