Azaroaren 9tik 22ra, Algortako eta Itzulbaltzeta/Romoko 70 establezimendu baino gehiagok parte hartuko dute kanpainan. Antolatzaileek azaldu dutenez, bi aste horietan, parte hartzen duten negozioetan erosten edo kontsumitzen den bakoitzean, bezeroek 100 euroko hamar opari-txarteletako bat irabazteko aukera izango dute.
Parte hartzeko, bezeroek kanpainari atxikitako establezimenduetan erosketa edo kontsumo bakoitzeko txartel bat jasoko dute. Txartela bete eta negozioetan bertan jarritako kutxetan utzi beharko dute.
Proposamenaren bidez, bi elkarteek erosketak sustatu gura dituzte, eta, aldi berean, bi auzoen arteko “bezero-trukea” erraztuz, auzotarrak ohiko erosketak egiten dituzten saltokietatik kanpoko establezimendu, produktu eta zerbitzuak ezagutzera animatuz.
Aurtengo berrikuntzak
Aurten, Algorta eta Itzubaltzeta/Romoren arteko sari gurutzatuen sistema erabiliko dute. Horri esker, antolatzaileen arabera, Algortako saltokietan egindako erosketengatik sarituak suertatzen diren pertsonek Itzubaltzeta/Romon parte hartzen duten negozioetan gastatzeko txartelak jasoko dituzte, eta Erromon parte hartu dutenek Algortako saltokietan erabili ahal izango dituzte euren sariak.
Bestalde, Bizkerre Futbol Taldeko Haizea jokalaria eta Aner Zasi-Eskola Dantza Taldeko dantzaria ekimenaren protagonista bihurtuko dira. Helburua "bi auzoak mugimenduan jartzea eta bertako bizilagunak bertako merkataritzaren alde egitera animatzea" izango da.