Eraikuntza lanek, gainera, hezkuntza mundutik kanpo ere interesa piztu dute. Izan ere, EHUko Bilboko Ingenieritza Eskolako 18 ikasle eta irakasle bertaratu dira proiektua ezagutzera. Elizondo Arkitektura taldeagaz elkarlanean antolatutako bisitan, egur kontralaminatuzko egitura eta erabilitako eraikuntza sistemak bertatik bertara aztertzeko aukera izan dute. Ikastolak jakinarazi duenez, eraikuntza sektoreko hainbat enpresa ere hurbildu dira obren bilakaera ezagutzera.
Eraikin berria ikastolak jasangarritasunaren alde martxan dituen ekimenen artean kokatzen da. Aurten, esaterako, eguzki plakak instalatu dituzte teilatuetan, urtean 106 MWh energia ekoizteko aurreikuspenagaz. Energia hori Auzoargi proiektuaren bidez inguruko famili eta herritarrekaz partekatzeko aukera izango dute. Horrez gainera, ikasturte honetan SanikoSolo eskola baratzea jarri dute martxan, ikasleek naturagaz harreman zuzena izan dezaten.
"Ez gara eraikin berri bat eraikitzen ari soilik; hezkuntza ulertzeko dugun modua eta ingurunearekiko konpromisoa gauzatzen ari gara", azaldu du Gaizka Arrizabalaga ikastolako zuzendariak.
Eraikin berria bisitatzeko aukera
Bitartean, ikastolan seme-alabak lehen aldiz matrikulatzeko interesa duten familiek eraikin berria barrutik ezagutzeko aukera izango dute. Horretarako, ate irekien jardunaldiak antolatu dituzte abenduaren 16an eta 17an, eta urtarrilaren 20an eta 21ean.
Aurtengo berrikuntza nagusia familiek eraikina obretan dagoela bisitatu ahal izango dutela da. Bisitak gidatuak izango dira, eta segurtasun neurriak beteta egingo dituzte.
"Gure hezkuntza-proiektua aukeratzeko hautua aztertzen ari diren familiek modu berezian ezagutzea nahi dugu: seme-alabek lehen eskola-urteak biziko dituzten eraikinean bertan sartuz", adierazi du Arrizabalagak.
Jardunaldietan parte hartu gura dutenek www.sanikolas.eus webgunean, 94 430 54 78 telefonoan edo ikastolako idazkaritzan eman dezakete izena.