Galeako Gotorlekuak doako bisitak eskainiko ditu abendutik urtarrilera

Laura Fontalba Colomo

Bisitak barikuetan, zapatuetan, domeketan, jai- eta zubi-egunetan egingo dituzte. 

Abenduaren 4tik urtarrilaren 6ra bitartean, Galeako Gotorlekuak doako bisita gidatuak eskainiko ditu XVIII. mendeko eraikuntza honen ezaugarri arkeologiko eta arkitektonikoak eta historia ezagutarazteko.

Udalak aurreratu duenez, bisitak euskaraz eta gaztelaniaz egingo dira, eta gehienez 20 laguneko edukiera izango dute saio bakoitzeko, espazioaren ezaugarriek eta bertan egiten ari diren obrek baldintzatuta. Ibilbideak barikuetan, zapatuetan eta domeketan egingo dituzte, baita jai- eta zubi-egunetan ere, 60 minutu inguruko iraupenagaz bi txandatan: 11:30etik 12:30era eta 16:30etik 17:30era. 

Helburua gotorlekuaren historiari eta ezaugarri arkitektonikoei buruzko azalpenak eskaintzea izango da, baita esparruan egiten ari diren arkeologia- eta arkitektura-lanei buruzko informazioa ere. Gainera, gotorlekuaren erabilera eta bilakaera testuinguruan jartzeko, material grafikoak eta berregite historikoak ere egongo dira eskuragarri.

Parte hartzeko, aldez aurretik webgunearen bidez eman beharko da izena. Izena eman ostean, bisitara joan ezin izatekotan, erreserba bertan behera utziko dutela jakinarazteko eskatu du Udalak, beste pertsona batzuek plazak baliatu ahal izan ditzaten.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun