Arantza Etxebarria alkateak sinatutako hainbat gutun helarazi zizkien etxebizitzen jabeei Udalak; horietan plaka frankistak kentzeko gomendioa eman zuen; “Udal honetan sufrimendua eta mina sor ditzaketen iraganeko garai politikoen edozein aztarna ezabatzeko interes berezia dago”. Halaber, auzotarren komunitateek ikurrak kentzeko zailtasunak izanez gero, Udalak lan horiek bere gain hartzeko prestasuna agertzen zuen. Hala, urtebete baino gehiagoren ostean, Gorlizko auzokideek, apurka-apurka, sinbologia frankista zeramaten ikur guztiak kendu dituzte, frankismoa kaletik ezabatzeko pauso berria emanez.
Francoren garaian derrigorrezkoa zen eraikitako etxebizitza guztietan plaka horiek ipintzea, administrazio frankistaren kontrolaren ikur legez. Era berean, horiek Francoren propaganda ofiziala errazten zuten.
Daborduko ez da Francoren garaiko plakarik ikusiko Gorlizko kaleetan, ezta etxebizitzetako atarietan ere; izan ere, auzotar guztiek gelditzen ziren iraganeko Etxebizitzaren Ministerioaren ikur falangista guztiak kendu dituzte. Udalak 2013an abiarazi zituen sinbolo frankistak udalerritik kentzeko lanak, eta hilabete askoren buruan, auzotarrek euren etxebizitzetatik kendu dituzte plakak; guztira 30 ikur inguru kendu dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun