Eskualdeko ia herri guztietatik igaro ostean, Gorlizen egingo du azken geldialdia ArgiHizkiak erakusketak. Momentuz hori da itxita daukaten azken ekitaldia, antolatzaileek adierazi dutenez. Hala, Uribe Kosta mailako literatur lehiaketaren hirugarren edizioan irabazle suertatu ziren hamar argazkiak eta horietan oinarritutako euskarazko testurik onenak ikusgai egongo dira Sertutxena (Eloisa Artaza, 3) eraikinean, martxoaren 10etik 22ra arte.
Sertutxenako erakusgelako ordutegiari dagokionez, bisitak astelehenetik barikura 10:00etatik 13:30era eta 16:30etik 21:30era egin daitezke. Zapatuetan ere zabalik dago aretoa 19:00ak arte. Eta domeketan eta jai-egunetan goizez bakarrik.
Egizu Getxo Euskaldun elkarteak eta UK aldizkariak 2014ko erdialdean abiatu zuten ArgiHizkiak lehiaketaren hirugarren edizioa, Uribe Kostako hainbat erakunde publikogaz (Leioa, Berango, Getxo eta Mankomunitatea) eta herrietako euskara-taldeakaz elkarlanean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.