Martxan jarritako neurrien artean, Gorlizlan izeneko plana azpimarratu beharra dago. Horregaz, enpresei herriko auzotarrak kontratatzeko diru-laguntzak eman zizkieten. Halaber, auzotar ekintzaileak diruz laguntzeko erabili zuten aipatutako programa. Guztira 60.000 euro bideratu zituzten plan horretara.
Horrez gainera, Udalak zazpi lagun kontratatu ditu udalerrian martxan jarri diren hainbat obratan: behargin bat, Uresarantzako bidearen bihurgunea moldatzeko lanetarako; hiru langile, San Jose auzoko obretarako, eta beste hiru behargin, Iturgitxi kalekoetarako. Era berean, legegintzaldi honetan Enplegu Publikoaren Eskaintza bi egin dituzte, udaltzain-plaza bat betetzeko eta brigadaren nagusia izateko.
Azken lau urteotan Udalak, guztira, 120 gorliztar kontratatu ditu aldi baterako. Jakinarazi dutenez, gainera, neurri horregaz ia 40.000 euro aurreztu dituzte, aparteko orduak egin beharrean, behin-behineko kontratuak eta ordezkapenak egin dituztelako.
Udalak antolatutako ekimen horiez gain, Eusko Jaurlaritzak berraktibaziorako martxan jarritako beste programa bategaz langabezian zeuden udalerriko zortzi lagun kontratatu dituzte, brigadan lan egiteko.
Guztira, udalerrian mila lagun baino gehiago kontratatu zituzten 2013an; iaz, berriz 993 kontratu zituzten, arlo pribatuan eta publikoan.