Zapatu honetan, hilak 13, Boulder Txapelketa Herrikoia egingo dute Gorlizko udal kiroldegian, auzolanean eraikitako boulderrean. Eskalada-zale batzuek antolatutako ekintza horregaz gozatu ahal izango dute interesatuek 10:30etik 14:30era, katu-oinak jantzita. Horretarako, goizeko 10:00etatik aurrera izena eta bi euroko inskripzio sinbolikoa besterik ez dute eman beharko. Izan ere, Udalak ekimena babestu ez duenez, karteletan eta sarietan inbertitutako dirua berreskuratzeko erabiliko dute dirutxo hori.
Antolatzaileen ustez horrelako "txapelketa txiki bat beti da motibagarria eskaladan hasi eta bultzatzeko. Boulderra ez da natura gehien bultzatzen duen eskalada mota, baina eskalada berez ezagutarazteak mendira eta harrietara eramaten zaitu, eta horrek bai, naturagaz harremana dauka. Kirol sanoagoa izan daiteke, ez da beste batzuk bezain hiritarra. Berez boulderra da eskaladaren parterik itsusiena, baina berrientzat errazena, eta txapelketa antolatzean, pixka bat dibertigarriagoa egin gura izan dugu".
Eskalada ikastaroa
Egun berean, Gorlizko Troka Abentura enpresak hasierako eskalada ikastaroa emango du: segurtasun-neurriak, materialak, segurtatze-teknikak, eskalatzeko teknikak, eta abar.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.