Iazko arrakastari jarraituz, Gorlizko Umore Gauen bigarren edizioa egingo dute aurton. Hala, umorearen antzezleku izango da Gorlizko Elizako plaza, barikutik domekara bitartean. Horretarako, karpa bat ipiniko dute antolatzaileek; euria egingo balu, bertan babestu ahal izateko. Egun bakoitzeko saio bana antolatu dute; gaueko 22:00etan hasiko dira emanaldiak, eta sarrera doakoa izango da. Gainera, arduradunek iragarri dutenez, bertara hurbilduko direnek Tito Blas ekoizlearen garagardoa dastatzeko aukera izango dute, 21:00etatik aurrera.
Lehenengo egunean, barikuan, "Improtxou" bat-batean sortutako antzerkia erakustera taularatuko dira Diego Perez, Mutxel Santamaria, Soledad Carril, Leire Orbe eta Aitor Borobia. Antolatzaileek jakinarazi dutenez, espektakulu horren alde "garrantzitsua" publikoa izango da, horien arabera garatuko baita istorioa. Hurrengo egunean, zapatuan, Olatz Beobideren, Belen Cruzen eta Amaia Lizarralderen "Nomofobikak" antzezlanaz gozatu ahal izango da. Horretan, sketch zein bakarrizketa bezala aurkeztuko dituzte istorioak, “betiere umorea lagun, burua astintzeko asmotan”. Amaitzeko, domekan, Maribel Salas eta Iñigo Salinero artisten bakarrizketek eragingo dituzte bertaratuko diren guzti-guztien irribarreak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.