Askotariko kalteak eragin ditu denboraleak Gorlizko ospitalean

Denboralearen ondorioz, ura sartu da osasun-etxeko hainbat gelatan. © OSAKIDETZA

Azken egunotako euriteek eta haizeteek kalteak eragin ditu Gorlizko ospitalean. Horren aurrean, Nekane Murga Osasuneko sailburuak azaldu du Osakidetzak kalteak zenbaterainokoak diren aztertuko dituela, "horiek ahalik eta lasterren konpondu ahal izateko". Era berean, azpimarratu du ospitaleko paziente denak "ongi zainduta" daudela.

Zapatuan, hilaren 9an, Sailburuak egindako informazio-bileran egon ziren Administrazio eta Finantzaketa Sanitarioko sailburuordea, Osakidetzako Osasun-laguntzako zuzendaria, Osakidetzako teknikariak eta Ospitaleko zuzendaritza, Carmen Rodriguez buru dela. Bileran azaldu zutenez, uholde-urek eta haize-bolada zakarrek askotariko kalteak eragin dituzte ospitalean: hainbat gelatan ura sartu da, leiho batzuk hautsi dira, estalki batzuk desagertu dira, leku batzuk urak hartu ditu eta tentsioa jaitsi da, eta arazo hori daborduko konponduta dago.

Sailburuak azaldu zuenez, Ospitaleko langileak hasieratik aritu dira lanean denboralearen eraginak arintzeko, pazienteen arreta lehenesteko eta txikizioak garbitzeko. Horrez gainera, hartzen joan diren neurrien berri eman diete familiei eta pazienteei.

Sailburuak Ospitaleko langile guztiek (garbiketako langileek, sukaldekoek, administrazioaren arlokoek, erizainek, fisioterapeutek, medikuek eta zuzendaritzak…) egindako lana, erakutsitako konpromisoa eta lankideakaz izandako elkartasuna ere eskertu zituen.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun