Inguruko udal-igerilekuetan izena emateko diru-laguntzak emango ditu Gorlizko Udalak

Ur kirolak egiteko diru-laguntzak emango ditu Gorlizko Udalak. Artxiboko irudia. © GETXOKO UDALA

Ur kirolak zein igeriketa ikastaroak egiteko instalaziorik ez du Gorlizko udalerriak. Hori dela eta, bertako Udalak diru-laguntzak emango ditu inguruko udalerrietako igerilekuetan izena eman dezaten gorliztarrek.

Gorlizen erroldatutako 18 urtetik beherako gazteek, 65 urtetik gorakoek eta langabezia egoeran dauden pertsonek eskatu ahal izango dituzte diru-laguntzok, betiere Sopelako edo Mungiako udal igerilekuetako ikastaroetan igerian ikas dezaten. Azaldu dutenez, emango duten laguntzaren zenbatekoa kalkulatzeko, kontuan hartuko dute zein alde dagoen kasuan kasuko udalerriko bazkideen kuotaren eta Gorlizko erabiltzaileentzat finkatzen den kuotaren artean.

2019ko ikastaroetarako deialdia arautzen duten oinarrien arabera emango da diru laguntza. Eskariak aurkezteko epea 2019ko abenduaren 20n amaituko da.