Koronabirusa Uribe Kostan

Udako kultur egitaraua prestatuko du Gorlizko Udalak

Kulturari lotutako egitarau bat prestatuko dute udarako Gorlizen. © GABI DE LA MAZA

COVID-19aren pandemiak eragindako normaltasun berriari egokituta, Gorlizko Udala lanean ari da aurtengo udarako aisialdi-egitarau bat eskaintzeko. Hala, udalerriko jaien ospakizunak moldatu eta herritarren osasuna eta segurtasuna bermatuko dituen ekimen batzuk mantenduko dituela iragarri dute udal-arduradunek, besteak beste.

Udan zehar, gainera, kulturari lotutako ekimen txikiak antolatuko dituzte Gorlizen, "erakargarriak eta interesgarriak" izango direnak, azpimarratu dutenez. Hala, arte eszenikoen arloan (dantza, musika, antzerkia...) eta erakusketak egingo dituzte, besteak beste, Bilboko Arkeologia Museoa eta Arte Ederretako Museoari esker.

Horrez gainera, udako zinea; 3 eta 5 urte arteko umeentzako udalekuak; eta Gazteleku eta Ludotekako zerbitzuak ere mantenduko dituzte, den-denak gaur egungo egoerara egokituta.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun