Koronabirusa Uribe Kostan

Gaixoen % 20 COVID-19agaz kutsatu da Gorlizko ospitalean

Koronabirusaren agerraldi batek Gorlizko ospitaleko gaixoen % 20 eta osasun-beharginen % 10 kutsatu du, Osakidetzak jakinarazi duenez. Hori dela eta, osasun-zentroak kanpoko bisitak bertan behera utzi ditu. Iturriek azaldu dutenez, ingresatutako gaixo eta langile denen baheketa egiten hasi dira birusaren zabalkundea eteteko asmoz.

Egindako baheketari esker, momentuz, positiboak atzeman dituzte gaixoen % 20 eta profesionalen % 10en artean. Dirudienez, kutsatzea kanpotik etorritako bisita batek eragin du.

Agerraldia mozteko asmoz, ospitaleak bisitak galaraziko ditu, abisu berria eman arte. Hala, bide telematikoak jarri dituzte martxan familien arteko harremana sustatu ahal izateko. Dena dela, ospitale horretan zaintza aringarriak egiten dituztenez, salbuespenak egingo dituzte hilzorian dauden gaixoak bisitatzerako orduan, iturrien arabera.

Bestalde, babes-neurri gisa, momentuz ez dute ospitalizazio gehiagorik egingo zentroan, eta kontsultak eta errehabilitazioak eten dituzte; zentro osoa desinfektatu dute.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun