EH Bildu utzi eta atxiki gabeko taldeko kide izatera pasa da Iratxe Irusta Gorlizko zinegotzia

Gorlizko zinegotzi den Iratxe Irustak EH Bilduko udal-taldea utzi du eta, orain, atxiki gabeko taldeko kide izatera igaro da. Koalizio abertzaleak ohar bidez azaldu duenez, bere kargua uzteko eskatu zitzaion, "zinegotziak ez dituelako herritarren ordezkari gisa dituen eginkizunak bete". Irustak, bere aldetik, azpimarratu du udal-taldetik "behin behineko egoera batean" alde egiteko erabakia berea izan dela eta EH Bilduk "hori baztertu zein gutxietsi" egin duela: "Nire kanporaketa irudikatu dute".

Herritarren ordezkari gisa dituen eginkizunak bete ez dituelakoan, udal-taldea uzteko eskatu dio Gorlizko EH Bilduk Iratxe Irusta zinegotziari. Koalizio abertzalearen Bizkaiko taldeak ohar bidez jakinarazi duenez, zinegotzi horrek hala eskatuta, EH Bilduren Berme Batzordeak egoera aztertu eta Irustak aurkeztu zituen arrazoiak baloratu zituen, "baina horiek ez ziren aintzat hartu".

Hori dela eta, Berme Batzordeak ebatzitakoan oinarrituta, "eta ordezkari publiko bezala Gorlizko Udalean eta Uribe Kostako Mankomunitatean zituen betebeharrak behin baino gehiagotan ez betetzeagatik", joan den irailaren 15a baino lehen bere kargua uzteko eskatu zioten zinegotziari.

Bizkaiko EH Bilduk gogoratu du epea igaro dela, eta Berme Batzordeak egindako eskaera alde batera utzita, Irustak zinegotzi-akta mantendu eta Gorlizko EH Bilduren udal-taldea uztea erabaki duela; hala, Udalbatzako atxiki gabeko taldeko kide izatera igaro da.

Iratxe Irustak, bere aldetik, adierazi du Berme Batzordearen ebazpenak duen forma eta edukia "onartezinak" direla eta, hori dela eta, EH Bildu uztea erabaki duela: "Berme Batzordeak nik eskatutako azterketa ez du forma egokian egin izan nik mahai-gaineratutako arrazoiak ez baititu kontutan hartu, ezta aztertu, ezta entzun ere, hauek baztertuak izan baitira atentzio-fokua beste gai batean jarriz".

Horren ildotik, Irustak deitoratu du EH Bilduk ez dituela "inongo asmo zantzurik adierazi izan sistema patriarkalak bermatzen dituen posizio ezberdinetan zelako ardurak ditugun aztertzeko eta, ondorioz, aldatzeko". Gauzak horrela, "behin behineko egoera batean" EH Bildu uzteko erabakia hartu duela azpimarratu du zinegotziak, "emakume batek bere etxetik alde egin behar duen moduan gauaren erdian jazartua izaten ari delako, ezin baitut onartu gizarte patriarkal hau mantendu eta birsortzeko hautua egin izatea Berme Batzordeak, eta horren aurrean planto egiten naiz".

Hala, udal-taldea utzi duen arren, zinegotzi-akta mantenduko duela iragarri du, "legealdia bukatu arte minimo": "Nire esku dagoena, nire gaitasuna eta marko instituzional honek ematen duen aukeran, herritarren ordezkaritza instituzionala demokrazian eta parekidetasunean oinarritzeko bermeak borrokatzeko asmoarekin geratu naiz posizio hori defendatzen".

Zentzu horretan, bere jardunean "askatasun eta segurtasunarekin" aritu ahal izateko bermeak eskatu dizkio EH Bilduri.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun