Ixaboiak, etxean eskuz egindako xaboiak

Mendibil ahizpak: "Antzinakoak bezalako xaboiak sortzen ditugu"

Mendibil ahizpek, Ixabelek, Anak eta Marisak, beraien xaboiak ekoizten dituzte, eskuz, osagai naturalak baliatuz eta ohiturazko errezeta tradizionaletan oinarritutakoak: «Gure amonek erabiltzen zituzten modukoak dira». 

Diotenez, pandemia hasi aurretik ekin zioten xaboiak sortzeari, eta, ordutik, ezagunak egin dira Uribe Kostan eta Bilbo inguruan. Hasieran, beraientzako eta oparitzeko egiten zituzten, eta, pixkanaka, geroz eta produktu gehiago sortzen hasi ziren. Egiten dituzten xaboien berria ahoz aho zabaltzen joan zen hasieran, eta, orain, azoketan eta Instagrameko @ixaboiak kontuan produktuak saldu eta enkarguak jasotzen dituzte.

Batez ere, xaboiak eta xanpu solidoa egiten dute, antzinako errezeta tradizionalak baliatuta, eta oliba-, almendra- eta errizino-olioa bezalako osagai naturalak erabilita. Horiek soda kaustikoagaz eta uragaz nahastu eta 30-40 egunez uzten dituzte ontzen, azkenean, xaboiak lortu arte. Horretaz gain, diseinu ederreko kandela beganoak ere egiten dituzte, soja-parafinagaz eta egurrezko mukiagaz. Horri esker, ez dute erleena edo artifiziala den parafina erabiltzen, eta kandelek gehiago irauten dute, astiroago erretzen baitira. Halaber, azala zaindu gura dutenentzako olioak eta lurrina besterik ez daramaten gorputzerako gantzak ere egiten dituzte.

Antzinan bezala, osagai naturalakaz egindako Ixaboiak-eko xaboi-sorta irabazi gura duzu? Bada, bat zozkatzen dugu; egin klik hemen eta parte hartu zozketan!

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun