Gorlizko alkatea den Ekaitz Pauk eskerrak eman dizkie Udaleko teknikariei prozesuan zehar jasotako 23 auzo-proposamenak xehetasunez aztertzerakoan egindako lanagatik. Halaber, eskerrak eman dizkie baita gorliztarrei udalerria hobetzeko konpromisoagatik eta inplikazioagatik. Aurrekontu parte-hartzaileen prozesu horren bidez, Gorlizko Udalak herritarrak inplikatu gura izan ditu, udalerria bera hobetzeko dituzten beharrak eta interesak azalduz.
Gorliz hobetzeko hiru proiektu gauzatuko dituzte tokiko 2024ko aurrekontu parte-hartzaileakaz
Uztailaren amaieran abian jarritako 2024 aurrekontu parte-hartzaileen prozesutik eratorritako behin betiko hiru proiektuen zerrenda aurkeztu du Gorlizko Udalak, eta 50.000 euro bideratuko ditu horiek gauzatzeko. Besteak beste, hurrengoak dira proiektuak: Gaminiz kaleko 11. eta 17. atarien arteko eremua oinezkoentzat egitea, oinezkoentzako pasabide berri bat margotzea eta espaloia egokitzea Barrenetxea parkearen goiko aldean eta Gandia plazan kirol anitzeko eremua handitzea. Hiru proposamen horiek izan dira ezarritako irizpide guztiak bete dituzten proposamen bakarrak. Aurreikusitako kostua aurrekontu parte-hartzaileetarako gordetako 50.000 euroen barruan dagoenez, ez da beharrezkoa izango herri-bozketaren fasea aktibatzea, eta hirurak zuzenean Udalaren aurrekontuetan sartuko dira 2024rako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun