Orubeak eta lurzatiak garbitzea arautzen duten Euskadiko Lurzoruari eta Hirigintzari buruzko Legea eta udal-ordenantzaren zehaztapena gogorarazi ditu Gorlizko Udalak. Bertan zehazten denez, hiri zein lan eremuetan dauden orubeen jabeek lurzati horiek osasun eta segurtasun baldintza egokietan eta itxura onean mantendu behar dituzte. Hala, mantentze hori urtean behin gauzatu behar da. Era berean, gogorarazten da ezin dela satsik, hondakin solido zein likidorik, sastrakarik, zaborrik eta baliogabeko tresnarik utzi jabego publiko zein pribatuko orube eta espazio libreetan. Aurreko xedapen horrek arratoiak hiltzeko eta desinfektatzeko egin beharreko lanak zein sasiak eta sastrakak kentzekoak agintzeko balio du ere.
Biodibertsitatean eta paisaian kalterik ez eragiteko eta Uribe Kostako gune babestuetan kolonizazioa eragozteko, Uribe Kostako Mankomunitateak panpa lezka landarea kentzeko proiektu bat jarri zuen abian. Panpa belarra espezie inbaditzaileen katalogoan jasotako espezie bat da, eta hemengo latitudeari dagozkion landare eta zuhaitz haztea zailtzen du. Lurzatian landare exotiko hori egonez gero, nahitaezkoa da hura kontrolatzeko eta ahalik eta azkarren ezabatzeko beharrezko neurriak hartzea, oso erraz zabaltzen baita.
Panpa lezka landareak kentzeko aholkuak hurrengoak dira: eskularruak erabiltzea (hostoek moztu egiten dute); ale gazteak eskuz ateratzea (lurra bustita dagoenean edo aurretik ureztatuta); tamaina erdiko landareak kentzeko aitzurra erabiltzea; mototsak agertu bezain laster moztea eta poltsa itxi batean gordetzea, haziak sakabanatu ez daitezen (ez astindu landarea) eta sustraiak aitzurragaz atera zatirik ez uzteko arretaz -pisu handia badu, sustraiak gora begira utzi lehortu arte-.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
