Gorlizko Udalak udalerriko argiteria publikoa hobetzen jarraitzen du, herritarren segurtasuna handitzeko xedeagaz. Hala, tokiko gobernuak LED teknologiako sei argi berri jarri ditu Andra Maria Elizako aparkalekuan, udaletxearen ondoan. Zehazki, udal-gobernuak 10.961 euroko inbertsioa egin du udalerriko beste puntu beltz bat kentzeko.
Gorlizko alkatea den Ekaitz Pauk adierazi duenez, apurka-apurka Gorlizko puntu beltz guztiak ezabatu gura dituzte: "Duela aste gutxi zazpi luminaria jarri genituen Estratakoetxe Parkean, lehen argirik ez zegoen tokian. Laster, argi berriak instalatzeko lanekin hasiko gara Itsasbide kalean, hondartzako aparkalekuaren inguruan".
Horrela, alkateak azpimarratu duenez, bizilagunek antzemandako Gorlizko puntu beltz guztietan "segurtasun sentsazioa " areagotzeko lan egiten jarraituko dute argiteria publikoa indartuz. Hala, alkateak eskerrak eman dizkie baita udal-teknikariei, herriko argi-puntuak hobetzeko egiten duten lanagatik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
