Onartu dutenez, martxa aurten ez egitearen erabakia euren "gogoz kontra" hartu dute. Azaldu dute edizio guztietan egiten den ibilbideari oztopoak jartzearen ondorioa dela, nahiz eta euren ustez, probak ez duen eragin negatiborik sortzen ingurunean.
Hala, nabarmendu dute mendiko bideak mendizaleek eta txirrindulariek gozatzeko izan behar dutela, eta elkartekideak direla, hain zuzen ere, "urtero eta proba egin aurretik, bidezidorrak garbitzen eta kentzen dituztenak".
"Asko sentituz eta tristuraz, Gorlizek galdu egingo du mountain bikeko ekitaldi erreferente bat, 500 parte-hartzaile inguru biltzen zituenak, Aldundiaren ikuspegi estuagatik eta beste erakunde batzuen inplikazio ezagatik", deitoratu dute.
Gainera, seinalatu dute probaren ustezko eragin negatiboetan jarri dutela arreta eta ez onura nabarmenetan. "Mendibike Elkarteak parte-hartzaileen guztizko kopurua mugatu du eta sustatzen ditu kirola eta bizimodu aktiboa, bidezidorrak mantentzen ditu, tokiko turismoa eta ostalaritza bultzatu...".
Hala ere, adierazi dute elkartetik jarduerak, irteerak eta topaguneak antolatzen eta planifikatzen jarraituko dituztela, "betiere mountain bikea bultzatuz".