Pinudiaren barruan gizalegearen aurka jazotako portaeren artean hurrengoak daude: baimendutako eremuetatik kanpo suak egitea; tokiko lasaitasuna galarazten duten sorgailuak dituzten bozgorailuak erabiltzea; mehatxuak eta istiluak; baimenik gabeko kanpaldiak eta zabor kantitate handiak pilatzea. Gorlizko Udalak azaldu duenez, jarduera horiek pinudiaren osotasunerako arrisku larria izateaz gain, "eragin kaltegarria dute inguruneaz modu arduratsuan gozatu gura dutenen esperientzian".
Udalak deitoratu bezala, joan den aste akabuan, gizalegerik gabeko ekintzengatik hainbat pertsonari isunak jarri ondoren, "gazte talde handi bat udaltzainengana hurbildu zen eta burdinazko larakoakaz mehatxatu zituen". Hala, Ertzaintzaren laguntza eskatu behar izan zuten bertatik alde egin ondoren, baina, une horretan, ez zuten patruilarik bertara joateko.
Horregatik, Gorlizko Udalak Bizkaiko Foru Aldundiaren eta Ertzaintzaren esku hartzea eskatu du, pinudia babesteko eta bertako lasaitasuna bermatzeko. Gainera, pinudian komun gehiago jarri beharko liratekeela ere komunikatu du, izan ere, jende andana bertaratzen da eta eremu osoa "pixa usainez eta gorotzez beteta" gelditzen da.