Eivissako Mare Nostrum folklore jaialdian euskal kultura zabaldu du Gorlizko Aratz Dantza Taldeak

Nahia Martinez Gondra 2024ko ira. 19a, 09:37

Bizkaiko eta Gipuzkoako dantzak aurkeztu ditu Aratz Dantza Taldeak, aurreskua edo uztai txiki dantzak, besteak beste. © ARATZ DANTZA TALDEA

Irailaren 14an eta 15ean aste-akabu berezia igaro zuten Gorlizko Aratz Dantza Taldeko kideek: Eivissako (Balear Uharteak) Mare Nostrum Folklore jaialdian parte hartzeko aukera izan zuten, euskal kultura beste lurralde batzuetan zabaltzeko parada aprobetxatuz. Izan ere, aurtengo Gorlizko Folklore egunean, ekainaren 23an, Eivissako Sant Josep de Sa Talaiako dantza taldea izan zuten gonbidatu berezia, eta, joan den aste-akabuagaz, bisita bueltatu diete dantzari gorliztarrek. Haien esanetan, "elkarbizitzarako eta kultura trukerako asteburua izan zen hura".

Emozioz betetako aste-akabua izan da. Zapatu arrastian, irailaren 14an, Aratz Dantza Taldeagaz batera Erromako, Valentziako, Castelloko eta Eivissako taldeek ere parte hartu zuten, eta, azaldu dutenez, bakoitzak "bere lurraldeko dantzen erakustaldia" egin zuen. Gorliztarrek Bizkaiko eta Gipuzkoako dantzak aurkeztu zituen, aurreskua edo uztai txiki dantzak, besteak beste.

© ARATZ DANTZA TALDEA

Nabarmendu dutenez, hartu-emana ez da soilik dantzaldira mugatu, aste-akabuan zehar talde guztiek bazkariak eta afariak partekatu dituztelako, modu horretan, dantzaz haratago harreman pertsonalak ehundu ahal izateko.

Azkenik, domekan, irailaren 15ean, Sant Josep de Sa Talaia herrian egin zuten dantzaldia, eta, horrela, gorliztarrek baieztatu bezala, ekainean hasitakoa borobildu ahal izan dute.

© ARATZ DANTZA TALDEA

Jendartea Gorliz

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun