2019 ekainean eta 2021eko maiatzean, Gorlizko udaltzain batek bere lankidea salatu zuen sexu-erasoagatik, hitzezkoa zein fisikoa. Kasua artxibatu arren, oraindino ez dago itxita. Salatutako udaltzaingoa lan-bajan egon da orain arte; datozen asteetan, ordea, lanera bueltatuko da. Horregatik, Sorginen Alabak talde feministak elkarretaratzea deitu du gaurko, otsailaren 26an, 18:30ean, Udaletxeko plazan.
Gorlizko Udalak zigor espediente bat ireki berri du, baina horrek denbora asko behar dezake ebazteko. Hala, Gorlizko bizilagunek "erantzukizuna eta berehalako erantzuna" eskatzen dute.
Zehazki, hurrengoak eskatzen dituzte: langilea kanporatzea, mahai-gainean jartzea edo bestela, emakumezko lankideakaz eta herritarrakaz harremanik ez duen lanpostu batean birkokatzea, egoera osoaren arretazko jarraipen eta kontrolagaz.
Era berean, lankideei eskatu diete horrelako jarrera edo eraso matxista edo sexistarik ez babesteko, eta "jarrera argia hartzeko abusuen aurka".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
