Udalbiltzak, Euskal Herriko udalen partzuergoak, 2021. urtean jarri zuen abian Geuretik Sortuak egitasmoa eta aurtengoak inoiz baino parte hartzerik handiena lortu du. Guztira, 30 udalerrik parte hartuko dute 30 sortzaile bekadunagaz batera. Elkarlan horretatik obra ezberdinak sortu eta hedatzen ari dira Euskal Herri osoan zehar, literatura eta komikitik hasi eta zinema eta antzerkiraino.
Gorlizen kasuan, Maitane Perez, sortzaile, idazle eta aktore iruindarrak, eleberri bat sortuko du, Gorlizko herria ardatz izango duena. Horretarako, hiru asteetan zehar udalerrian egonaldia egingo du herria eta herritarren istorio eta kontakizunak ezagutzeko helburuagaz, ostean, horregaz guztiagaz, fikzio bat sortzeko.
Maitanek beka honen aurreko bi deialdietan ere parte hartu izan du eta esperientzia dauka horrelako prozesuetan, eta arreta, batez ere, jendea ezagutzeari eta beragaz kolaboratu gura duten guztiak entzuteari jarri gura dio.
