Ansola arduratuta agertu da ELAko idazkari nagusi Mitxel Lakuntzak egindako adierazpenakaz, "lotsarik barik aitortu baitu grebak eta etengabeko tentsioa gure ongizate eredua aldatzeko tresnak direla”. Horren aurrean, Ansolak ELAren, LABen eta EH Bilduren estrategia seinalatu du: “Benetan nahi ote dugu munduko mapan Euskadi herri gatazkatsu gisa agertzea? ELAk, LABek eta EH Bilduk eskutik eskura darabilten estrategia horrek isolamendura garamatza, hondamendira eta gizarte ireki, lehiakor eta moderno gisa ingurukoen konfiantza galtzera”. Hala, Bizkaiko jeltzaleen buruak EH Bilduri aurpegiratu dio “beste albo batera begira geratzea, besteok lan zikina egiten duten bitartean”, eta alderdikideei eskatu die irmotasunez aurrera egiteko.
Ildo horretan, Ansolak EAJren eredu propioa aldarrikatu du eta Uribe Kostan aurrera eramandako proiektuak nabarmendu ditu: "Armintzan, BIMEP bultzatuz, energia garbiaren eta berrikuntzaren aldeko apustu gisa; URAk sustatu dituen saneamendu lanetan; mugikortasun proiektuetan, hor daude metroa, bidegorriak, Bizkaibus eta itsasadar azpiko tunela. Eta, horrekin guztiarekin, zer izan dugu aurrean? Betikoa: pankartak. Baina ez gara kikilduko. EAJ-PNV ez da oztopoak jartzera etorri, lan egiten duen alderdia gara. Hori da EAJ-PNVren indarra: lan egitea eta hurbiltasunez kudeatzea, lanean burua eta bihotza jarriz”.