Udaleko etxebizitza eta eskubide sozialetako teknikariak egindako txosten baten arabera, azken urteotan "desoreka geroz eta handiagoa da eskuragarri dagoen etxebizitza-eskaintzaren eta benetako eskariaren artean", batez ere iraupen luzeko alokairuari dagokionez. Gainera, erabilera turistikorako etxebizitzen kopurua etengabe hazi da, eta horrek ohiko egoitzak murrizteaz gain, bizilagunek etxebizitza duina eta eskuragarria aurkitzea zailtzen du.
Dokumentuak azpimarratzen duenez, daborduko etxebizitza turistikoen kopurua alokairu tradizionaleko etxebizitzena baino handiagoa da udalerrian, eta garaiz jarduten ez bada, egoera areagotu egingo dela iragartzen du.
Lizentzia berrien eteteak indarrean jarraituko du Hiri Antolamenduko Plan Berezia egin eta onartu arte. Plan horrek udalerriko etxebizitzaren erabilera turistikoa arautzeko arau-esparru argi bat ezarriko du, turismo-eredua udalerriko eguneroko bizitzarekin bateraezina izan ez dadin. Udalak azpimarratu duenez, neurriaren helburua ez da turismoa kriminalizatzea, baizik eta Gorlizko bizilagunei etxebizitza duina izateko eskubidea bermatzea.