Udalak urrats sendoak ematen jarraitzen du herritarrei udal zerbitzu eraginkorragoak, eskuragarriagoak eta hurbilagoak eskaintzeko konpromisoan. Ildo horretan, Herritarrentzako Arreta Zerbitzuan (HAZ) hobekuntza berriak jarri dira abian, erabiltzaileen egunerokotasuna errazteko xedeagaz. Berrikuntza nagusietako bat telefono bidezko arreta indartzea da: hemendik aurrera, kontratazio berri bati esker, langile batek lanaldi osoa telefono bidezko arretara bideratuko du, zerbitzua eraginkorragoa bilatuz.
HAZeko altzariak ere berritu egin dira, aurrez aurreko arreta hobetzeko helburugaz. Orain, arreta mahai baxuagoetan ematen da, langileak eta erabiltzailea eserita daudela, komunikazio zuzenagoa eta erosoagoa ahalbidetuz. Egokitzapen horrek, gainera, mugikortasun murriztua dutenen irisgarritasuna errazten du.
Itxaronaldian erosotasuna bermatzeko asmoz, doako kafe makina bat jarri da herritarren eskura. Eta laster, txanden banaketa automatikoa bideratzeko makina bat jarriko da, antolaketa hobetzeko eta itxaronaldietan eragozpenak edo nahasteak saihesteko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
