Gune berria 0 eta 3 urte bitarteko haurren familiei zuzenduta dago eta adin txikiko haurren jolas eta garapenerako eremu egokitua eskaintzea du helburu. Heldu-laguntzaileak hartzen du adingabearen ardura, baina leku estali bat du, material didaktiko eta seguruakaz hornitua, jolas-denboraz gozatzeko.
Txikiguneak lekua partekatuko du ludotekagaz, baina eremu bereizi batean. Astelehenetik eguenera irekiko da, bai goizez (10:00etatik 13:00etara), bai arrastiz (16:15etik 20:15era). Horrela, adin desberdineko seme-alabak dituztenek ludoteka eta txikigune zerbitzuak konbinatu ahal izango dituzte.
Beste berrikuntza nagusietako bat ludoteka ordutegiaren luzatzea da. Horrela, zabalik egongo da astelehenetik eguenera 16:15etik 20:15era. Kokalekuak berdina izaten jarraituko du, baina leku guztiz berritua eta material ludiko-didaktiko berriagaz. Gaztelekuak, bere aldetik, irailaren 26an irekiko ditu ateak eta lekuz aldatuko da (Eloisa Artaza 3), adinaren beharretara egokitutako leku bat eskainiz. Gainera, ordutegia gazteen eskari errealera moldatuko da: bariku, zapatu eta domeketan, 17:30etik 20:30era.
Ekimen horien helburua ez da bakarrik kontziliazioa hobetzea eta etapa bakoitzari egokitutako baliabideak eskaintzea, izan ere, udalerriak kalitatezko eta euskarazko aisialdi hezitzailearekin duen konpromisoa indartzen dute.
