Guztira aurkeztutako 13 proposamenetatik, hiru hauek izan dira irabazleak eta, beraz, 2026an zehar Udalak gauzatuko dituenak: batetik, Guzurmendi auzoko trafikoa berrantolatzeko azterlana, mugikortasuna eta, batez ere, bide-segurtasuna hobetuko dituena; bestetik, bizikleta-erreia Itsasbide kalean motorrik gabeko joan-etorriak sustatzek; eta, azkenik, Baserritar Eguna, euskara eta euskal kultura sustatzeko jai-egun bat sortzea, herritarren arteko harremanak eta parte-hartzea indartuz.
Udalak 50.000 euroko inbertsioa egingo du hiru proiektu horiek errealitate bihurtzeko, herritarren erabakitzeko ahalmenagaz eta "eraikuntza kolektiboagaz duen konpromisoa" berretsiz.
Aurtengo edizioan, 23 eta 64 urte bitarteko bizilagunek parte hartu dute egitasmoan, generoaren araberako ordezkaritza orekatuagaz (% 56 emakumeak eta % 44 gizonak).
Udaleko iturriek azpimarratu dutenez, 2023an lehen aldiz abiatu zenetik, partaidetza-prozesu hau funtsezko tresna gisa finkatu da herritarrak udal-kudeaketan inplikatzeko eta, denen artean, Gorliz jasangarriago, kohesionatuago eta parte-hartzaileago bat eraikitzeko.