Proiektuak eraikinaren barne-eraberritze osoa planteatzen du, banaketa, akaberak eta altzariak barne, jatorrizko egitura errespetatuz eta hiru solairuak erabilera bereizietara egokituz. Gaineratu dutenez, eraldaketa hori da, halaber, Kultura Saila Udaletxeko eraikinera lekualdatu izanaren arrazoia, eta bertan jarraituko du zerbitzua normaltasunez eskaintzen.
Proiektuaren ardatz nagusietako bat irisgarritasuna izango dela azpimarratu dute udal-iturriek; izan ere, liburutegiak irisgarritasun unibertsaleko estandarrak betetzeko helburua ezarri dute, eta lehen aldiz komun eta ibilbide egokituak izango ditu, aniztasun funtzionala duten pertsonei sarbide osoa bermatzeko.
Beheko solairuan ikasteko eta lanerako gunea sortuko dute, urteko 365 egunetan erabilgarria izango dena, sarbide independente bati esker. Lehenengo solairuan, aldiz, umeentzako eta familientzako eremua egokituko da, irakurketa eta jolas txokoakaz, baita formatu txikiko jarduerak eta tailerrak egiteko gune malgu bategaz ere. Azkenik, bigarren solairuan, irakurketarako eta ikasketarako areto isilak kokatuko dituzte.
Gorlizko Udaleko iturrien arabera, "liburutegi berriak udalerriko kultura bizitza indartuko du, irakurketa, ikasketa eta topagune gisa sendotuz". Proiektuak, gainera, udal kultur ekipamenduen modernizazioa bultzatuko du, eta herriaren kultur nortasunaren eta bizi-kalitatearen aldeko urrats garrantzitsua izango da.