Gaur goizean, Alberto Martinez Eusko Jaurlaritzako Osasun sailburua eta Lore Bilbao Osakidetzako zuzendari nagusia Gorlizko Ospitalean izan dira, Txus Romon gerente berriagaz eta zerbitzuburugaz batera. Bisita hau Osasun Sailak abian jarritako "entzute aktiboko prozesuaren" barruan kokatzen da, osasun-profesionalakaz harremana estutzeko eta arreta hobetzeko proposamenak jasotzeko asmoz.
Birgaitze-lanei esker, egungo lau oheko gelak ezabatu eta zortzi gela indibidual eta zortzi gela bikoitz izango dira, pazienteei intimitate eta erosotasun handiagoa eskaintzeko. Era berean, asistentzia eta biltegiratze gune berriak sortuko dira. Lanek 1.041 metro koadroko azalera hartuko dute eta 2026ko udaberrian hasiko dira, 18 hilabeteko epean gauzatzeko aurreikuspenagaz.
Osasun Sailak adierazi duenez, proiektu hau "Gorlizko Ospitalea arretaren humanizaziora egokitzeko urrats handia" da, eta Bizkaian eskaintzen den osasun-arreta kalitatezkoa, hurbila eta irisgarria izaten jarraitzeko konpromisoaren parte da.