Inbertsio garrantzitsu honen bidez, udalerriko hainbat kaleren egoera kaxkarra konpondu gura du Udalak, bai hirigunean, bai inguruko eremuetan. Ekaitz Pau alkateak azaldu duenez, "gorliztarren eta bisitarien eguneroko bizitza errazteko pentsatutako esku-hartzea da, segurtasuna eta irisgarritasuna hobetuz eta higadura handia duten kaleetan eraginez".
Proiektuak biltzen dituen jardueren artean, bideak asfaltatzeaz gain, bigunguneak konponduko dituzte eta abiadura-murriztaileak jarriko dira ibilgailuen joan-etorria lasaitzeko. Horregaz batera, kutxatilak doitu, seinaleztapena berritu eta espaloiak beheratuko dituzte, mugikortasun urriko pertsonentzat irisgarritasun egokia bermatzeko.
Udal-zerbitzu teknikoek egindako diagnostiko bati erantzuten diote lanok, bideen egoera pixkanaka eta era integralean hobetzeko asmoz. Obrak udalerriko hainbat txokotan egingo dituzte. Besteak beste, Fano Bidea, Itsasbide, Krutzeta, Mungiabidea, Artebiondo eta Urezarantzabidea kaleetan arituko dira makinak datozen asteetan. Lan horiek guztiak 2026. urtean zehar burutzea aurreikusi du Udalak, herriko bide-sarean segurtasun handiagoa eta erosotasuna lortzeko asmoz.