Lanak ez dira herrigunera mugatu, eta udalerriko hainbat auzo eta aldiritara ere iritsi dira. Udalaren arabera, esku-hartze bakoitza toki bakoitzean antzemandako beharretara egokitu dute, herriko mugikortasuna hobetzeko eta auzo guztiek azpiegitura egokiagoak izan ditzaten.
Egindako lanen artean, Udalak Palanketeko esku-hartzea nabarmendu du. Gorlizek eta Plentziak partekatzen duten kalea izanik, bi udalek elkarlanean egin dituzte bertako hobekuntzak. Helburua kalearen egoera berritzea eta bertatik igarotzen diren herritarrei bide seguruago eta erosoagoa eskaintzea izan da.
Lokatzak sortzen zituen arazoei ere irtenbidea
Asfaltatze-kanpaina egoera txarrean zeuden beste bide eta sarbide batzuk konpontzeko ere baliatu dute. Zenbait tokitan, euria egiten zuenean lurra erraz lokazten zen, eta horrek oinezkoen zein ibilgailuen joan-etorria zailtzen zuen. Asfaltatze-lanei esker, Udalak sarbide horiek seguruagoak, erosoagoak eta irisgarriagoak direla dio orain, urteko edozein sasoitan erabiltzeko.
2026ko kanpaina amaituta, Udalak herriko kaleak eta bideak mantentzen eta hobetzen jarraituko duela aurreratu du, sortzen diren beharrei eta herritarrek helarazitako eskaerei erantzunez.