Irailaren 3an 22 urteko emakume batek salaketa jarri ostean abiatu zuen ikerketa Ertzaintzak. Segurtasun Sailak jakinarazi duenez, emakumea etxera bueltan zihoan goizaldean, jende gutxi zebilen eta etxebizitzetatik aldenduta zegoen inguru batetik. Une batean, gazte bat atzetik segika zuela ohartu zen eta, handik gutxira, aurpegia buru-beroki bategaz estalita zuen gizon bat sexu-erasoa egiten saiatu zitzaion.
Biktimak aurre egin zion eta bien arteko borrokan hainbat urradura eta ubeldura izan zituen. Inguruko bizilagun bat emakumeari laguntzera hurbildu zenean, erasotzaileak ihes egin zuen. Ertzaintzak egindako ikerketari esker, 24 urteko ustezko erasotzailea identifikatu eta joan den zapatuan atxilotu zuten.
Atxiloketaren ostean, gizonak agenteei aitortu zien abuztuaren 8an antzeko beste eraso bat egin zuela. Kasu hartan, 21 urteko emakume batengana hurbildu zen, berriro ere aurpegia estalita eta jenderik gabeko inguru batean. Bularraldetik heldu eta bultza egin zion, baina emakumea oihuka hasi zenean ihes egin zuen. Gerora, Ertzaintzak biktima identifikatu zuen eta hark salaketa jarri zuen.
Beste emakume batengana ere hurbildu zen
Gorlizko Udaltzaingoaren laguntzagaz egindako ikerketan, beste kasu baten berri ere izan dute. Irailaren 3ko gau berean, atxilotua beste emakume baten zain egon zen, Segurtasun Sailaren arabera; emakumeak, ordea, ibilgailu batean sartzea lortu zuen eta handik alde egin zuen.
Polizia-eginbideak amaituta, gizona epailearen esku utzi zuten astelehenean, eta agintari judizialak espetxeratzeko agindua eman zuen. Ikerketak zabalik jarraitzen du, salatu gabeko antzeko gertakari gehiago edo biktima gehiago egon daitezkeen argitzeko. Orain arte ezagututako kasuetan, Segurtasun Sailaren arabera, erasotzaileak goizaldean jarduten zuen, leku isolatuetatik bakarrik zihoazen emakume gazteengana hurbiltzen zen eta buru-berokia erabiltzen zuen aurpegia estaltzeko. Atxilotu zutenean, buru-berokia haren gauzen artean aurkitu zuten.