Etxeko txikienek zabalduko dute eguna. 10:30etik aurrera, 1 eta 8 urte arteko umeentzako lasterketak egingo dituzte. Ordubete geroago, 11:30ean, gazteen eta helduen txanda izango da, bi distantziagaz: 5 kilometroko proba, 10 urtetik gorakoentzat, eta 10 kilometrokoa, 14 urtetik gorakoentzat. Webgune ofizialaren arabera, 5 kilometroko ibilbideak 75 metroko desnibel positiboa izango du, eta 10 kilometrokoak, 150 metrokoa.
Baina helmugara heltzeagaz ez da eguna amaituko. Korrikalarien artean 30 sari baino gehiago zozkatuko dituzte, Gorlizko saltokien laguntzari esker. Horien artean egongo dira 300 euro inguruko balioa duen QLED telebista bat, jatetxeetako menuak zein gosariak, produktu-sortak, arropa, kirol-materiala, entrenamenduak eta edertasun-tratamenduak. Zozketa 13:00etan egingo dute, Udaletxearen aurrean.
Dortsalak, aldez aurretik edo domekan bertan
Parte-hartzaileek dortsala eta kamiseta aldez aurretik jasotzeko aukera izango dute. Barikuan, irailaren 25ean, 17:00etatik 21:00etara, eta zapatuan, irailaren 26an, 10:00etatik 13:00etara, kiroldegian banatuko dituzte. Domekan bertan ere jaso ahal izango dira, 09:30etik 11:15era, udal-frontoian.