Etxebizitza eta Okupazioa jardunaldien kronika

Erabiltzailearen aurpegia

Joan den zapatuan, martxoak 14, Etxebizitza eta Okupazioa jardunaldiak burutu genituen Algortako Eztabaida Gunean. Hiru ordutan zehar, garai eta leku ezberdinetan garatutako proiektu ezberdinen esperientziak jaso genituen, eta solasaldi oso interesgarri eta aberasgarria eman zen. Horren adierazle daukagu, 60 pertsonetatik gora batu izana goiz osoan zehar; jardunaldien lekua bera labur geratu zitzaigun.

Jorratu ziren edukiei dagokienez, okupazioaren inguruko hainbat hausnarketa ezberdin atera ziren. Okupazioa zertarako? Nola burutu okupazioa? Nola ikusten da okupazioa gizartean? bezalako galderei erantzuten saiatu ziren Euskal Herri osotik zein kanpotik etorritako gonbidatuak, bakoitzak bere borroka propioetatik bizi eta ikasi izandakoak azalduz. Horrez gain, aurretik izandako edota gaur egun martxan dauden proiektu ezberdinak ezagutzeko aukera izan genuen, hala nola, Gasteizko Errekaleor auzo okupatua, Txantreako emantzipazio bulegoa, Bartzelonako Can Vies zentro soziala eta Bilboko Okupazio Bulegoa, besteak beste.
Hala ere, jardunaldiak ez dira ekimen isolatua izan, eta bertan jorratutako edukiek jarraipena izatea planteatzen dugu. Izan ere, ikasturte hasieran aurkeztutako “Non daude giltzak?” kanpainaren baitan kokatzen ditugu, zeinak etxebizitza arazoaren aurrean, okupazioa alternatiba erreal gisa aurkezten duen. Beraz, hemendik aurrera, bai lehenagotik egindako zein jardunaldietan hausnartu eta ikasitakoa praktikara eramatea falta zaigu, hurrengo zita Txorimalo gaztetxearen urteurrenean burutuko den okupazio tailerra dugularik.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun