Joan zaigu jada aurtengo Gazte Martxa. Pena bat, baina orain nekea, mina eta ajea gainditzea dagokigu! Hiru egunean zehar aldarriz bete genituen Lekunberri, Irurtzun, Berriozar eta Iruñea; eta martxan gaudela erakutsi genuen! Nazkatuta gaude egoera prekarioez, zapalkuntzaz eta gure bizitzak besteen menpe edukitzeaz; burujabe izan nahi dugulako, gure bizitzen jabe.
Gazteok martxan egotearen beharra ulertu dugu, herrietan borrokak piztearen beharra. Soilik antolatzen den herriak lor ditzakeelako helburu handiak. Eta gazteok lehenengo lerroan egon behar dugu, etorkizuna gurea da eta!
Horregatik herriz herri, auzoz auzo borrokan jarraituko dugu, burujabetza lortze bidean gurea dena lortu arte. Herri burujabea da gure helburua, eta, horretarako, ematen ditugun urrats guztiak garrantzitsuak dira. Txikitasunetik handitasunera doan bidea funtsezkoa da, herria mugarri dugu!
Hortaz, Euskal Herriko gazte guztiak borrokara batzeko deia luzatzen dugu. Bakoitzak bere esparrutik, bizi dugun sistema aldatu eta herri aske batean bizi ahal izateko!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
