2025ean, udal-talde guztiek zerbitzu berriaren bideragarritasun plana onartu zuten. Helburua, lizitazio berri bat nola eta zein baldintzatan egin beharko den zehaztea zen. Bertan, hobekuntzak proposatu zituzten hainbat eremutan: kirol eskaintzan, instalazioen mantentze-lanetan eta garbiketan eta euskararen erabileran, besteak beste. Gainera, Abadesoloko igerilekuak dauden erakinaren ondoan beste eraikin berri bat egitea aurreikuste da. Dena ondo bidean, zerbitzu berria ikasturte hasieragaz abian jarriko litzateke.
Erabaki hau hartu baino lehen, Udalak bere kirol politika publikoak zehazteko OTS aholkularitzari eskatu zion laguntza. Kirol zerbitzu berria 2024an hasi zen Sopelako Udalaren Kirol plan estrategikogaz. Adierazi dutenez, plan horregaz "adin guztietako sopeloztar guztiek egunero kirolaz gozatzea lortu nahi da, kantitatea, kalitatea eta kirolarekiko atxikimendua handituz".
Kirol-teknikariaren lanpostua sortuz gero, kirol instalazioen ikuskaritza teknikoa ere kontratatu zen, horren araberako legeztatze plan bat garatuz. Horrez gain, Sopelako Udalak eta BPXport Sopelana SL enpresak kirol-instalazioak kudeatzeko kontratua adostu zuten aurreakordio bategaz, kontratu berria esleitu arte zerbitzua ematen jarraituko duela bermatuz. Izan ere, Udalarentzat kiroldegiko lanpostuak mantentzea lehentasun bat izan da.
Aldi berean, Udalak kirol-instalazio berriaren proiektua idazteko eta obrak zuzentzeko lizitazioa egingo du eta, proiektua idatzi ondoren, sei milioiko inbertsioagaz lizitatuko dira obrak. Bai kirol ekipamendu berria, bai liburutegi berria finantzatzeko, Sopelako Udalak 1.798.000 euroko balioa duten hiru lursail saldu berri ditu eta beste bost lurzatiren lizitazio berri bat abian jarri du; HAPOren aurrerapen-dokumentuan edo zirriborroan jasotako proposamenak kontraesan barik. Hau da, lursail publikoak saltzea, beti ere lurzati horiek zuzkidura-ekipamenduetarako edo babes publikoko etxebizitzen etorkizuneko sustapenetarako erabili ezin badira.