Azaroan zehar, Barrika, Gorliz, Lemoiz, Plentzia, Sopela eta Urdulizko liburutegi eta kultur etxeetan Izartxo ipuina eta familientzako gida ezagutzeko aukera izango dute herritarrek, Gotzone Butron eta Aitziber Raya ipuinaren egileen eskutik.
Jarduera sei urte arteko haurrentzat izango da, beti ere familiako kide batek edo bik lagunduta. Plaza mugatuak izango dira, asko jota 15 ume izango dira tailer bakoitzean. Izen-ematea telefonoz, emailez edo bertaratuta egingo da, eta plazak eskaerak jaso ahala beteko dira. Plazarik lortu ez dutenekin itxarote-zerrenda sortuko da.
Ordu beteko emanaldian ipuina entzungo dugu, sehaska-kanta ikasi, marrazki handi bat egin, hainbat liburu gomendagarri ezagutu, aholkuak jaso, zalantzak partekatu eta, bukatzeko, denok batera abestuko dugu.
Gerturatzen diren familia guztiek jasoko dute opari modura ipuina, hainbat aholku, kantak eta liburu gomendagarriak eta beste hainbat gomendio jasotzen dituen gida.