Baina zer esan nahi du zuzendari teknikoaren lanpostuari perfilaren derrigortasun data kentzeak?
Bada, horrek esan nahi du Getxo Antzoki berriaren zuzendari teknikoak ez duela zertan hirugarren perfil bat izan, hau da, ez duela zertan euskalduna izan. Baldintza horrek dakartzan ondorio guztiekin, noski; barne-mailan aritzeko hizkuntza gaztelania izatea, hori gutxi balitz, herriko elkarte, norbanako zein agente ezberdinekin zuzendari teknikoak egingo dituen harremanak gaztelaniaz izatea. Izan ere, zuzendari teknikoak ez du izango derrigor, perfil egokia eskuratzea euskaraz normaltasunez eremu horretan harremanak egiteko.
EH Bildutik gogor salatu dugu gertaera hau, eta Udal-gobernuaren konpromiso eza, euskaldunon hizkuntza eskubideen eta hizkuntza normalizazioaren alde. Izan ere, ez du balio data konkretuetan euskararen erabileraren sustapena egitea, egunerokotasunean horrelako hizkuntza urraketak bultzatzen direnean, ez denean bermatzen udal-instalazioetako arduradun gorenak euskaldunak izango direnik. Horri hipokresia deitzen zaio, eta kasu honetan, beste behin ere, euskal hiztunon komunitatearen aurkako eraso zuzena da.