Getxoko Udalak babestutako eraikinak botatzen jarraituko du legegintzaldi honetan. Horren adibide dugu irail honetako osoko bilkuran hartuko duten erabakia. Ostegunean, hilak 26, Arrigunagako jaitsieran dagoen eraikin bat botatzea adostuko dute EAJk eta PSEk, bertan etxebizitza bloke berri bat eraikitzeko. Arrigunagako jaitsieraren 1. zenbakian dagoen eraikin horrek udal babesa du, eraikinaren aurrekaldeko hormak hain zuzen ere, baina Udalak hala ere aldeko txostena egin du eraikina botatzeko.
Getxoko EH Bildutik gogor salatu nahi dugu Udal Gobernuaren erabaki hau. Eraikin historikoak eta gure ondarea zaindu beharrean, espekulazio eta negozioari ateak zabaltzen dizkiote. Zoritxarrez, adibide gehiegi izan ditugu azken urteotan. Hori da PNV eta PSEren hirigintza-planteamendua (hauteskundeetan alokairu sozialaz berba egiten duten arren): eraitsi, txikitu eta eraiki.