Portu Zaharreko Etxetxua babestu!

Erabiltzailearen aurpegia

Algortako portu zaharrean dagoen “Etxetxu” eraikina egoera larrian dago gaur egun. Kanpotik ematen duen itxura ikustea besterik ez dago egoeraz jabetzeko. Azken hiru urteetan bere egoerak okerrera egin du eta urtarriletik erabilera publikoa duen estalitako plaza itxita dago. Portu zaharreko auzokideek eta bisitariek, beraz, ez dute bertan batzeko aukerarik: hesi batek plazara sartzea eragozten du, eta eraikinaren zutabe nagusiak apuntalatuta daude.

Plaza hau da portu zaharreko auzokideen topaleku nagusia: bizilagunekin batzeko, euria egiten duenean bertan elkartzeko, jarduerak antolatzeko (Auzokidearen Eguneko bazkaria, Portu Zaharreko jaietako kartelaren aukeraketa eta abar). Sei hilabete hauetan, beraz, plaza horren erabilera publikoa ez da bermatu, eta auzokideek ezin izan dute erabili.

Ez dago gogoratu beharrik zein den Etxetxuaren balio historiko eta sinbolikoa: XVII. mendean sortutako eraikin honek arrantzaleen kofradia eta Getxoko udaletxea hartu zuen, besteak beste. Algortako portu zaharreko erreferente nagusia da zalantzarik gabe.

2016. urtean Etxetxua salgai egon zen, eta Getxoko Udalak aukera galdu zuen eraikina erosi eta babesteko. Geroztik, ikusi ahal izan dugun bezala, eraikinaren egoerak okerrera egin du, gaur egungo egoerara arte.

Ezinbestekoa da erakunde publikoek gure herriko nortasuna eta historia osatzen duen ondare historikoa babestea eta bere erabilera publikoa bermatzea. Are gehiago, gainera, ondare publiko hori arriskuan dagoenean, Etxetxuaren kasuan bezalaxe.

Gauzak horrela, eta bere egoera larria ikusirik, Getxoko EH Bilduk mozioa aurkeztuko du, honakoa proposatuz: 

  1. Getxoko Udalak berehala eta era subsidiarioan eraikinaren osotasuna eta jendartearen segurtasuna bermatze aldera beharrezkoak diren konponketak egingo ditu.
  2. Getxoko Udalak eraikina bereganatzeko eta bere izaera publikoa bermatzeko beharrezko urratsak emango ditu.
  3. Getxoko Udalak eraikin horretarako erabilera publikoa bermatzen duen erabilera proiektua egingo du Portu Zaharreko auzokideekin elkarlanean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun