Zenbat buru, hainbat aburu

Erabiltzailearen aurpegia

Barkatuko didazue baina oraingoan, beste kontu askori buruz idazteko gogoa dudan arren, gazteria eta politikaren inguruan idazteko beharra dut. Behintzat nik Algortan dudan esperientziaren inguruan eta beste herri askotarako aplikagarria dena, nire uste apalean.Urte hasieran mantendu genuen elkarrizketa atsegin batean "Ausarta zara ezker abertzaleko gazteria nagusi den herri batean EAJkoa zarela esaten" esan zidan aspaldi ikusi gabe nuen ikaskide ohi batek. Harrituta utzi ninduen "Ausarta?". Nire iritzia ematen duen gazte bat besterik ez naizela erantzun nion, eta ezker abertzalea Getxon, laugarren indarra dela gogorarazi nion, EAJ lehengoa delarik. "hain arraroa ote naiz?", pentsatu nuen. Ziur ezetz. Badakit ezetz.

Portu zaharreko jaietan, ezker abertzaleko lagun batekin inguratzen gintuen parafernalia politikoaz hausnartzen geundelarik, niretzat kontu honetan gakoa den esaldia bota zidan: “hemengo gazteria ez da Ezker Abertzalekoa, van de que son de la izquierda abertzale”. Arrazoi guztia eman nion, horrela pentsatu izan dut beti. Postureo asko dagoela uste dut, batez ere jai herrikoietan. Kuriosoa da jai herrikoiak ez direla herriaren islada; agian horregatik gazteriak ez du isladatzen, kalean, ikastetxe elektoraletan aukeratzen duena?

Nik gazteak lasai asko euren iritzia ematera animatzen ditut, euren aukera politikoa edozein delarik ere. Ez dago arazorik. Osasuntsua da gizartean iritzi desberdinak egotea, aberasgarria. Iritzia publikoki emateak ez gaitu inoiz lekuz kanpo sentiarazi behar. Jendea desberdin pentsatzeagatik baztertzen duenak du arazoa, ez norberak. Baina tira: baliteke publikoki iritzia ematea horren erreza ez izatea jendeak horretarako "ausarta" izan behar dela uste baldin badu…

 

(HIRUKAKO 68. ALEAN ARGITARATUA)

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun