Cables Y Alambres enpresan ematen den LABen aurkako jazarpen sindikala salatu dugu

Erabiltzailearen aurpegia

Duela denbora batetik hona Cables y Alambres (Vicinay taldea) enpresako zuzendaritzak LABeko delegatuak jazartzeari ekin dio. Gaur LABek deituta 82 ordezkari eta langile batu gara enpresa aurrean mezu argi batekin: jazarpen sindikalaren aurrean, elkartasuna eta borroka.

Cables Y Alambresen egoera ez da berria. Etengabeko atzerapenak ematen dira soldata sariak jasotzeko, 2015etik enpresa Vicinay taldearen parte denetik inbertsio falta nabaria da eta lan istripuak eguneroko ogia dira. Gainera, Erandioko Udalak enpresa kokatua dagoen lurzorua birkalifikatu nahi du, etxebizitzak eta eremu berdeak jasotzen duen PGU-ari bide emateko.

Hau gutxi balitz egoera lazgarri hau onartu ez eta ahotsa altxatzen duen orori isilarazteko jazarpenari ekin dio enpresa zuzendaritzak. Mehatxuak, eguneroko presioa, ordezkaritza sindikala garatzeko etengabeko oztopoak. Horiek dira LABeko delegatuek lantokian bizi dutena.

LAB sindikatuak argi dauka: ez ditu langileak bakarrik utziko eta ez du onartuko langile eskubideak defendatu eta lan baldintza duinen aldeko jarduna zigortzea. Jazarpen sindikalaren aurrean, langileon arteko elkartasuna eta borroka.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun