Estetika politika kontua ere bada

Erabiltzailearen aurpegia

Gaurkoan, lapurtutako plaza baten aldarrikapenerako erabili nahiko nuke leihotxo hau, oihukatzeko dauden hamarnaka gaien artean aukeratzea zaila bada ere: Herriko Tabernak LIBRE, txosnetan musika jator-dantzagarria, Internazionalismoa ez da delitua, ligoteo sanoa bai... Baina uda garai honetan, kontuak konpartitzeko eta hondartzatik bueltan pipak jateko tokia behar dugun honetan, Txiki Otaegi (San Nikolas nahi duenarentzat) plazarekin egin dutena salatu nahiko nuke.

Ustez, Antzokiaren eraikin “postmodernorretrokalifragilistikoa”-rekin bat datorren ingurunea bilatu nahi izan du getxoztarron diruaz ordaindutako arkitektoak. Horretarako, urteetan bahitu digute plaza, horrek suposatzen duen kalte sozial, ekonomiko eta emozionalarekin. Orain, askatu duten honetan, egunero ikusten dugu algortarrok plaza izateko genuen beharra, gainezka egoten baita Euskalmetek baimena ematen duenean behintzat.

Baina herri-ondare kolore ederrekoa zen plaza hura, nortasun gabeko grisez jantzi dute; bankuek ez dute besteentzako lekurik apenas usten, paperontziak oporretan joan dira, iturriak ez du egarria kentzen, kioskoak ezin ditu sari banaketak eta bertsolariak hartu…. eta hori gutxi balitz, mezatara igo zein txokorrak lasaitasunez erre nahi zenituzten horiek, porlanezko eskailerak zatarrak dituzue (eta ondarearen babesa?). Balorazio estetikoak politikatik at utzi behar direla sinestarazi digute. Ez gaitzatela engainatu; porlan grisaren atzean modernizazio nahia baino askoz estrategia sakonagoa dago. Plaza deserosotu dute, nortasuna kendu, herri ekimenetarako zaildu… Hori edo, gure 40 milioi euroekin ordaindutako arkitektoak, Alcorconeko plazarako zuen proiektua birziklatu du Algortan.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun