Agur eta ohore Jose Ignacio

Erabiltzailearen aurpegia
Jose Ignacio Gutierrez, gure betiko Guti, zergatik utzi behar izan gaituzu hain goiz? Zure bilobekin hain ilusionatuta ikusten zintugun, gurditxoarekin paseatzen, harro harro… Denek galdetzen zizuten Izadiren gurasoez. Ea zelan zebiltzan Espainiako kartzela urrun eta krudel haietan, mendeku gosea eta harropuzkeria kartzelarioa berdintasunezko elkarbizitzaren gainetik gailentzen den lekuan. Rosaren eskutik, zure presentzia militanteak, zure semearen garrasi isildua helarazten zuen beharrezko zen tokietara, apaltasun eta umiltasunez.
 
Zure faltak mintzen gaitu. Baina oinaze horrekin batera, poza eta zu ezagutu izanaren harrotasuna geratzen zaizkigu. Gaztarotik, saltsa guztietan ibili zara. Herri hau antolatzen eta autogestinatzen hasi zenean, eltze guztietako zale: Portu Zaharrean jai herrikoiak aldarrikatu eta martxan jartzen, Kantarepeko kuadrila enblematikoan, arrauna eskuetan edota zuzendaritza lanetan gogoz indartu duzun Algortako zure arraun-klub maitean, eta grisetatik zein berdeetatik ihesi amnistiaren aldeko manifestazioetan. Guti, zuk utzitako aztarnak, ez dio lekurik utziko ahanzturari. Horregatik, beti egongo zara gurekin.

Besarkada bero bat Rosa emazteari, espainiar kartzeletan bahituta daukaten Guti zure semeari, eta baita familia zein lagunarte osoari. Plazer bat izan da bidean zurekin topo egitea. Adiorik ez!

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun