Preso politikoen nazioarteko egunean, Algortan ere oihukatu ASKATASUNA!

Erabiltzailearen aurpegia

Getxo eremu gorrian sartu eta perimetralki itxi denez, apirilaren 17an, Preso Politikoen Nazioarteko egunean ezin izango gara Bilbora joan. Horregatik, Algortan manifestazioa burutuko dugu baita ere, 12:00etan Telletxe plazatik.

Euskal preso eta iheslari politikoak gatazka politikoaren ondorio eta adierazle dira. Gatazka politiko horren jatorrian Euskal Herriak bere etorkizuna libre eta demokratikoki erabakitzeko duen eskubidearen ukazioan dago. Francoren ondoren eratuzen 78ko Erregimenak ez zion arazo politiko horri erantzun demokratikorik eman; ez zuen aurreko erregimenarekin hautsi. Eta horrek, gure herriaren etorkizuna kolokan jartzeaz gain, gatazkaren luzamendua ekarri du, alde anitzeko sufrimendua, milaka euskaldunen espetxeratzea.  Bestalde, hamarkada hauetan espetxean, ihesean eta deportazioan egon diren militanteei aplikatu zaizkien neurri guztiak kolektiboak eta politikoak izan dira, helburu zehatz batekin: independentismoa kaltetzea. Horregatik ez daude oraindik etxean, ETAk borroka armatua utzi zuenetik dagoeneko hamar urte igaro diren arren.

Azken hamarkadan, gatazka bideratzeko urrats erabakigarriak egin ditu ezker abertzaleak eta euskal jendarteak. Hortaz, baldintza eta adostasun nahikoak eraiki dira Espainiako Estatuak ere, orain arte ez bezala, konponbideari hel diezaion.

Arazo politikoei konponbide politikoak eman behar zaizkie. Espainiako estatuak ezin du beste aldera begiratu. Euskal Herriarekin eta Kataluniarekin duen arazoari eta, oro har, lurralde auzia deitu zaion horri, konponbide demokratikoa eman behar diola barneratu behar du behingoz.

Preso eta iheslari politikoen auziaren konponbideari dagokionez, azkenaldi honetan eskubide urraketa lazgarri batzuk gainditzeko urratsak egiten hasi dira. Orain, jauzi bat eman behar da, euskal preso eta iheslari politiko guztiak etxera ekartzeko. Elkarbizitza demokratikoak preso politikoen askatasuna eskatzen du eta horretarako, orain arte bezala, adostasun zabalak eta mobilizazio soziala funtsezkoak izango dira. Soilik euskal jendartearen aktibazioak berma dezake ireki berri den aukera bururaino eramango dugula.

Horregatik, SORTUk apirilaren 17an, Preso Politikoen Nazioarteko Egunean, Askatasuna lelopean antolatu diren mobilizazioetan parte hartzeko deia luzatzen du. Euskal Herriak bere etorkizuna demokrazian, bakean eta askatasunean eraiki behar duelako. Euskal preso eta iheslari politiko guztiak etxean behar ditugulako, Telletxen topatuko gara askatasuna aldarrikatzeko.

Jo ta ke denak etxera ekarri arte!

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun