Umiltasuna, izaera kritikoa, kolektibotasuna, elkartasuna eta borrokarako grina. Hauek dira Txorimalo Gaztetxeak dauzkan balore eta ezaugarri preziatuenak. Eta nola ez, baita Txorimaloren aurrekari izan diren Sastraka, Kutxitril, Burdinola, Maidagan, Aixerrota eta Mentxakabarri gaztetxeek ere.
Zenbatezinak bertatik sortutako proiektu eta alternatiba kultural, sozial eta politikoak. Ordainezina proiektu hauek herrigintzan eta amesten dugun Euskal Herriaren eraikuntzan egindako ekarpena.
Ehunaka izan dira proiektu eta alternatiba hauetan parte hartu duten algortar eta getxoztarrak. Ezker Abertzaleko kide askorentzat ere, Txorimalo eta gainontzeko gaztetxeak gure lehen eskola izan dira; eta bihotzean tatuatu dizkigute aurretik aipatutako baloreak. Askori, gaztetxeek lehen hazia landatu ziguten erraietan. Argi izan dezatela hazi horrek ereindako kimuak ezin izango dituztela inoiz desalojatu, gure parte baitira.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
