Ikusezinen garaipena

Erabiltzailearen aurpegia

Orain hilabete aipatzen nituen Bilboko Arte Ederretako Museoko grebaren inguruko kontu batzuk. 41 egunez Museoa itxita eduki ondoren, lortu dute beharginek grebari amaiera eman dion akordioa: lan hitzarmenaren lau urteko iraunaldian soldatak ia bikoizteraino emendatuko dira eta, zerbitzuaren ardura duen enpresa aldatuta ere, langileei beren lekuetan jarraituko dutela bermatu zaie. Nabarmen hobetuko ditu, beraz, akordioak gizon-emazte hauen bizi-baldintzak.

Esan beharrik ez dago hobekuntza ez zaiola zor Museoko nagusi diren erakundeen esku zabaltasunari, hauek, “pertsona helburu” eta horrelako eslogan humanistak erabili zale izanagatik, ahal izan duten bitartean miseriazko baldintzetan eduki baitituzte Museoko langileak. Hobekuntza irabazi egin dute beharginenek, grebari heldu eta eutsita.

Bejondeiela Museoko langileei bataila txikiz jositako neoliberalismoaren aurkako guda globalean beren borrokaldia irabazteko gauza izan direlako! Bejondeiela, baita ere, borrokaldia babestu duten sindikatuei, erakutsi baitute, beste behin, agintari asebeteek egozten dietenaren kontrara, beren aldarrikapenak ez daudela errealitatetik kanpo, jende xehearen premia oinarrizkoenei atxikita baizik.

Eta, grebarenak eginda, gaurtik aurrera eta irailaren 26 bitartean, goza dezagun espiritu jaso eta larrekoagoek ere Arte Ederretako Museoak eskaintzen digun Eskultura Hiperrealistaren erakusketa ikusgarriaz.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun